Lalo pang iaangat ng NEWS5 (TV5 News and Information Division) ang antas ng paghahatid-tulong at serbisyo sa mga Pilipino sa pagsisimula ng bagong programa nitong “T3: Kapatid, Sagot Kita!” kasama ang pinangingilagang magkakapatid sa larangan ng pamamahayag—sina Raffy, Ben at Erwin Tulfo— simula Setyembre 5 (Lunes) bago mag-AKSYON Prime sa TV5.
Panig sa mga naaapi at galit sa mga nang-aapi, magsasanib-pwersa ang Tulfo brothers para ihatid ang bagong takbuhan ng taumbayan, ang “T3: Kapatid, Sagot Kita!” Sina Raffy, Ben at Erwin ang magsisilbing tinig at kakampi ng mamamayan laban sa katiwalian, kalokohan at kasamaan ng mga mapang-abusong indibidwal at tiwaling gawain ng iba’t ibang sangay ng gobyerno.
“Bawat araw dinadagsa ang public service unit natin ng mga reklamo mula sa mga kababayan nating naging biktima ng iba’t ibang pang-aabuso. Nakakarinig din tayo ng mga kwento tungkol sa mga kababaihan at kabataang minamaltrato. At mahigit isang taon matapos tayong magluklok ng mga bagong tao sa gobyerno, talamak pa rin ang mga sumbong sa mga opisyales na hindi tapat sa kanilang sinumpaang tungkulin. Mahirap ipagwalang-bahala ang mga ganitong sakit ng lipunan. Kailangang kalampagin ang mga may-sala at tulungan ang mga kababayan nating walang-wala,” ayon kay Luchi Cruz-Valdes, hepe ng NEWS5, hinggil sa T3.
“Ikinararangal naming ihandog sa publiko ang T3 kahanay ng mga programa ng NEWS5 na naghahatid ng, higit sa balita, serbisyo at aksyon. May bago nang sumbungan ang mamamayan,” ayon pa sa pinuno ng TV5 News and Information Division.
Maghahandog ang programa ng mga segment na sasapul sa pangangailangan ng publiko.
Ben Tulfo
Erwin Tulfo
Raffy TulfoBagamat daang matuwid ang nais tahakin ng administrasyon ni Pangulong Aquino, tila bali-balikong daan pa rin ang pinipiling puntahan ng mga tiwaling opisyales. Pananagutin ng Action Man ng Bayan na si Erwin Tulfo ang mga kurap at tutulog-tulog sa pwesto sa “Ambush.”
Samantala, dahil sa kaliwa’t kanang krimen sa lansangan, mas nagiging mapanganib na para sa publiko ang Metro Manila at iba pang siyudad sa bansa. Mahuhulog sa bitag ng batas ang mga kawatan sa “Modus” kasama si Ben Tulfo. Bukod sa babala, ibibisto rin ni Ben ang mga raket ng mga mapang-abuso at ituturo ang mga pamamaraan kung paano makakaiwas ang publiko sa mga raket at modus operandi.
Karaniwan ng walang kalaban-laban sa mga abusado ang kababaihan at kabataan. Ang Utol ng Bayan na Si Raffy Tulfo ang magbibigay ng agarang aksyon sa mga problema ng pang-aapi at pang-aabuso sa kahinaan ng mga babae at bata sa “Resbak.”
Aaksyunan din ang mabagal na pag-proseso ng mga dokumento at mga ipinagkakait na benepisyo sa “Kapatid, Sagot Kita” habang magbibigay-daan naman upang maibalik sa kani-kanilang pamilya ang mga taong nawawala sa “Missing.” Pararangalan naman ang mga tapat at mga opisyal na dedikado sa trabaho sa “Saludo.”
Huwag palalampasin ang pinakamatapang na public service program sa telebisyon, simula na ngayong Lunes (Setyembre 5) bago mag-AKSYON Prime sa TV5.
2 Comments
Gud pm po….ako. po c joy barroa of sampaloc manila.sir hingi po sna ako ng tulong sa inyo kc po yong dati kong pinapasukanng trabaho puro paasa po ung gnagawa nila sa backpay nmin halos mg isang taon na po pg-aantay nmin hanggang ngayon wala prin.6month pregnant po ako now kya inaasahan ko po tlga ang perang un na pinaghirapan ko dn nmn po.sna po matulungan nyo ko sa problema ito.raffco int’ltrading corp./plains&prints po ung company.contact no.po 372-61-90 to 93.antayin ko po ang inyong sagot.maraming salamat po.
gud pm po mga sir, hihingi po sana ako ng tulong tungkol po sa dati kung security agency ito po ang asegco security agency sa kadahilanan po na isang taon pong hindi nila hinuhulogan ang aking sss nung nag reklamo po ako sa kanila puro lang po sila pa asa ng pa asa gusto ko po sanang ma reklamo sila para ma tigil na ang kanilang pananamantala sa kanilang mga security guard ito po ang kanilang contact # 454-55-39 sana po ay ma actionan nyu po agad ito para matigil na cla at masarado ang agency na ito….. maraming salamat po…