Kilala ng publiko si Jinkee Pacquiao sa kanyang marangyang pamumuhay bilang Mrs. Pacman, ang may-bahay ng isa sa pinakamagiting na boksingerong nabuhay, si Manny Pacquiao. Mula sa kanyang dating payak na buhay sa Sarangani Province, hanggang sa magarbong pamumuhay kadikit ang mga sikat at mayayaman kabilang na ang hotel heiress na si Paris Hilton, ilalahad ng Anggulo ang buhay ng babae sa likod ng tagumpay ng Pambansang Kamao ngayong Miyerkules pagkatapos ng AKSYON JournalisMO sa TV5.
Kasama si NEWS5 chief Luchi Cruz-Valdes, idodokumento ng mga senior reporter na sina Jove Francisco, Benjie Dorango, Maricel Halili, Ina Zara at Roices Naguit-Sibal ang iba’t ibang perspektibo sa buhay ng mga taong laman ng balita—mula sa kanilang pinanggalingan hanggang sa pinakamaiinit na isyung hinaharap nila sa ngayon.
Ilalahad ni Ina Zara ang glamorosang buhay ni Mrs. Pacman at ang kanyang paggawa ng sariling pangalan bilang isa sa mga tinitingalang tao sa bansa. Mula sa kanyang photo shoot para sa isang sikat na beauty clinic hanggang sa kanyang mamahaling koleksyon ng bag at bagong mansyon sa Forbes Park, tila handang handa na nga si Jinkee sa buhay-celebrity.
Samantala, lilipad naman sa Sarangani si Jove Francisco para balikan ang naging buhay ni Jinkee bago pa ang yaman at kasikatang tinatamasa niya ngayon. Kakausapin ng batikang reporter ang mga kaibigan, kamag-anak at katrabaho ni Jinkee; habang eksklusibong ipasisilip ni Mrs. Pacman ang bagong mansyon ng mga Pacquiao sa General Santos City.
Ipakikita naman ni Roices Naguit-Sibal ang mahalagang papel ni Jinkee bilang financial ng Pacquiao business empire. Mismong si Roices makakasaksi kung paanong mag-isang hinahawakan ni Jinkee ang mga negosyo ng kanilang pamilya. Kakamustahin din ni Roices si Mrs. Pacman bilang ina at asawa sa gitna ng mga intriga.
Huwag palalampasin ang pilot episode ng Anggulo (Isang Mukha, Iba’t Ibang Pananaw, Isang Kuwento) ngayong Miyerkules (Setyembre 7) pagkatapos ng AKSYON JournalisMO sa TV5. Mapapanood ang maagang pagtatanghal ng Anggulo, 8:30pm sa Aksyon TV (Channel 41 sa Mega Manila, Channel 29 sa Metro Cebu at Davao, Channel 1 sa Cignal Digital TV at Channel 59 sa Sky Cable).
